Bergüner Ländlerfründa

Freie Erzählung von Werni Walser
1970 hät dr Pölla d Lehr als Elektromontör bir Firma Kummler & Matter z'Bergün agfanga. Dr Papa (dr Lieni Walser) isch in dära Buda Gschäftsfüahrer gsi, also dr Scheff vum Pölla. Dua bin i no schwär in d'Schual und ha dernäba vil Zyt gha, uf minam nöia Klarinett uma z'trucka (natürli mit pfiffa). Das hät ma schinbar bis in d'Werkstatt ghört, dia isch nämli drei Stöck unter minam Zimmer gläga. Dr Pölla isch uf all Fäll vu mina Künscht häll begaischtarat gsi und hätt mi am nöchschta Tag gfrogt, ob i ihm d'Griff für dia hocha Tön nid chönnti zaiga. I natürli ganz schtolz: "Jo, jo, das kann i scho!"
Am nöchschta Samschtig bin i dänn uf z'Poschti Richtig Latsch. Im Sack a Füfliber vur Mama und unterem Arm ds'Klarinett. Dr Poschti-Schofför Clo Florinett hät mi sicher uf Latsch ufa brocht. In dr Schtuba vo z'Struba dänn a zünftigi Ernüachtarig für da kli Walser. Dr Pölla und dr Moll (Pöllas Papa, dr Paul Strub senior) händ mi nämli halba trümmlig gschpilt! Vu wäga hochi Tön und Werni! Dia hät miar denn dr Pölla biprocht - baidi sind miar jewiils in Schweiss badet gsi. Vu döt awägg bin i dänn praktisch jeda Samschtig mit em Clo, em Klarinett und em Schlitta uf Latsch ufa gfahra. As isch güabt worda, im Sitza, im Stoh, uf em Stalltach und au bim Marschiera.
Bis ins Johr 1974 händ dr Moll und dr Pölla unterem Nama "Kapella Strub" im Duo Musig gmacht. I han no nid mittörfa, i bin jo no nid konfirmiert gsi. Aber im April isch as denn sowit gsi. Vo döt awäg hät mi nüt meh könna heba. Dr Pölla und ii sind wia siamesischi Zwilling go musiga, bi jedera Glägaheit und an jedem Alass. Miar händ sogär as Mol no anera Beärdigung (also dr Giulio isch guat achzig gsi) im Wiss Chrütz z'Bergün Musig gmacht. Und dänn isch as mit da Bergüner Ländlerfründa erscht so richtig losganga.
Vo 1974 bis 1976 in dr Bsetzig: Pölla und Werni Klarinett, Papa Moll und Papa Walser Örgali und Hitsch Hassler Bassgiga. 1976 isch d Mia Kast, a Cusina vum Pölla, als Bssischti für da Hitsch Hassler igschtiga. 1982 häd miar wider a nöia Hitsch übercho. Dr Papa Walser isch nämli vum Hitsch Züscht us Furna abglöst worda. Ab em Joor 1989 hett mina Bruader, dr Markus Walser, langsam aber sicher em Papa Moll sina Platz überno. 1995 hät ds Vroni Oberli (damals Egli) d'Mia an dr Bassgiga abglöst. Sie hät dänn natürli mit so viil go spila a netta Maa gfunda und hät jetz sälber a Familia. Us däm Grund hämmer für üsseri viila Uftritt no a zweita Bassischt suacha müassa. Miar sind kaiba froh, dass miar mit am Fluri Burger a witeri Korifäa am Bass händ dörfa in üsserer Rundi ufneh.